Бітімгершілік бөлімшелерді дайындау және олардың НАТО мемлекеттерінің қарулы күштерімен жедел үйлесімділігі аясындағы мәселелер Солтүстік Атлант Шарты Ұйымының 28 елі мен Польшадағы жедел үйлесімділік бастамасының 26 қатысушы елінің қорғаныс министрлері отырысында көтерілді.
Отырыс НАТО саммиті шеңберінде өтті. Оған ҚР Қорғаныс министрінің орынбасары генерал-майор Талғат Мұхтаровтың басшылық етуімен Қазақстан Республикасы Қорғаныс министрлігінің делегациясы да қатысты. Бүгінгі күні қазақстандық армияда бітімгершілік бөлімшелерді дайындауға ерекше көңіл бөлінеді. Шетел мемлекеттері Қарулы Күштерінің тиісті бөлімшелерімен тәжірибе алмасу және бірлесіп практикалық өзара іс-қимыл жасау үшін Қазақстан Республикасының Қорғаныс министрлігі жыл сайын «Дала қыраны» бітімгершілік оқу-жаттығуын өткізеді. Аталмыш оқу-жаттығу Ұлыбритания, АҚШ және НАТО-ның өзге де елдері және серіктес елдермен 2003 жылдан бастап Қазақстан мен шетелдің әскери полигондарының аумағында өтеді. Қазіргі уақытта «Дала қыраны» оқу-жаттығуы Орта-Азиялық өңірдің қарулы күштерімен НАТО мемлекеттерінің өзара іс-қимылын ұстап тұрудың пәрменді құралы болып табылады. Қосымша қорғаныс министрлерінің отырысы аясында қазақстандық делегация қорғаныс ведомстволарының өкілдерімен, оның ішінде, Әзірбайжан, Армения, Ирландия Біріккен Араб Әмірліктерінің қорғаныс министрлері, Польша Қорғаныс министрлігі мен Оңтүстік Корея қарулы күштері штабтар бастықтарының біріккен комитеті басшылығымен, НАТО жанындағы Жапонияның өкілімен бірқатар кездесулерге қатысқанын айта кеткен жөн.
