Осымен төртінші күн ҚР ҚК-нің авиабазасы қорғаныс саласындағы мамандарды, ал 4 және 5 маусым күндері барлық келемін деушілерді қабылдап жатыр.
Көрмеде көптеген қызықтарды көруге болады. Экспозиция 8 павильонда және ашық алаңдарда өрістетілді. «Арлан» броньдалған дөңгелекті машиналары және қазақстандық өндірістің «Барыс» броньды транспортеры, қазақстандық Әскери-әуе күштерінің авиатехникасы, Құрлық әскерлерінің әскери техника үлгілері, жаңғыртылған тікұшақтар мен танктер, оптикалық және электрондық приборлар көрсетіледі. Экспонаттардан басқа, көрме қонақтары үшін әр күн сайын авиатехниканың мүмкіндіктері көрсетілуде. Көк аспанда өздерінің шеберліктерін Су-30 жойғышында қазақстандық әскери ұшқыштар көрсетуде. Су-27 ұшақтарында «Жетісу» пилотаж тобының ұшулары, сондай-ақ TL-2000, Zlin242 және Як-130 оқу ұшақтарында ұшу шеберліктері паш етілуде. Көрмеде алғаш рет ЕС-145 тікұшақтарында «Найза» пилотаж тобынан ерекше вальс ұсынылды. Сонымен қатар Қазақстан Республикасы Қарулы Күштері Құрлық әскерлерінің әскери техникасы да өз мүмкіндіктерін көрсетті. Олардың арасында келушілер танктерді, «Кобра», «Арлан» броньдалған машиналар мен хаммерлерді тамашалады.
