Жанұядай ұйысқан үлгілі қызмет

Жанұядай ұйысқан үлгілі қызмет

Әскер тегі құрылған уақыттан бастап біраз белесті артқа тастаған қару-жарақ қызметінің мамандары көптеген маңызды істерді жүзеге асырды. Б. Момышұлы атындағы 28237 әскери бөліміндегі қару-жарақ қызметінің мамандары да өздеріне жүктелген міндеттерді мінсіз орындап, әскери борыштарына адалдық танытып келеді. Олардың еңбегінің ең бастысы сол – бөлімде қару-жарақтың есебі, оны сақтау мен қолдану бойынша бір де бір қауіпсіздік шараларының бұзылуына жол берілмеуі. Бүгінгі әңгімеміздің өзегі де осы қызмет туралы болмақ.

Атқарылған істер ауқымды

28237 әскери бөлімі құрылған күннен бастап бөлімде қару-жарақ қызметі де құрылды. Бөлімнің қару-жарақтарын ақаусыз күйде сақтап, оның жауынгерлік әзірлігін қамтамасыз етуді алдына мақсат тұтқан қару-жарақ қызметі бөлім құрылған жылдан бастап күні бүгінге дейін жылдар бойы біршама тұщымды істің атқарылуына ұйытқы болды. Көлденең кездескен қиыншылықтар мен күрмеуі шешілмеген мәселелер бұл қызметтегі офицерлер мен келісімшарт әскери қызметшілерінің ерен еңбегіне тосқауыл бола алмады. Олар «жұмыла кіріскен жүк жеңіл» екенін нақты іспен дәлелдей білді.

Соңғы жылдардағы қарулы қақтығыстардың талдауы көрсеткендей әскер тектерінің жауынгерлік әзірлігі қару-жарақ пен оқ-дәрілермен тікелей қамсыздандырылуына, олардың жауынгерлік қолдануға ұдайы әзірлігі мен жай-күйіне байланысты болып отыр. Соған орай Ұлттық ұландағы қару-жарақ қызметінің базасы да ұлғайып, қару-жарақты сақтау мен оған қызмет көрсетудің жаңаша нормалары енді, ҚР Ішкі істер министрі мен Ұлттық ұлан Бас қолбасшысының бұйрықтары мен директиваларымен арнайы ережелері бекітілді.

Қазақстан Ішкі әскерлері 2014 жылы Ұлттық ұлан болып қайта құрылған кезде Қазақстан Республикасы Төтенше жағдайлар министрлігінің құрылымында болып келген азаматтық қорғаныстағы 28237 әскери бөлімі ІІМ Ұлттық ұланының құрылымына өткен болатын. Сол кезден бастап бөлімнің қару-жарақ қызметіне жаңа міндеттер жүктелді, құтқару батальондары бөліністерінде қару-жарақ пен оқ-дәрілерді сақтау бөлмелері, қару-жарақты жөндеу шеберханасы қойылды, қару-жарақ пен оқ-дәрілерді сақтау қоймалары қайта жабдықталды, физикалық қорғаныстары күшейтілді.

Қазіргі уақытта аталған қызметтегі тың жұмыстардың басы-қасында жүрген қару-жарақ қызметінің бастығы капитан Қуаныш Байзақовтың да еселі еңбегін атап өтпеске болмас. Өз ісіне тыңғылықты қарайтын білікті офицер өзіне жүктелген жауапкершілікті жете түсінеді. Бағыныштыларын да өз ісіне жауапкершілікпен қарауға баулиды. Қару-жарақ қызметі туралы ол: «Бөлімдегі қару-жарақтардың әрдайым жауынгерлік әзірлікте болуына және ақаусыз күйде жұмыс істеуіне жеке жауапкершілік алғаннан кейін бұл қызметте асқан табандылық пен ұқыптылық таныту қажет. Қару-жарақ болған соң, оның жұмыс істеуі де адам ағзасы сияқты. Уақыт өткен сайын ескіреді, бұзылмай тұрмайды. Күтіп ұстаған қару-жарақ та ұзақ қызмет етеді. Қару-жарақ қызметіндегі және жалпы бөлімдегі барша әскери қызметшілерге де әу бастан-ақ осы қағидаға сай жұмыс істеулерін үйретіп келемін. «Елге жүгіне қызмет етсең, еңбегің жанады»,- дейтін жаны бар жақсы сөз бар. Сол айтқандай бүгінгі күні қару-жарақ қызметі бойынша кемшіліктердің болмауы, қауіпсіздік шараларының бұзылуына жол берілмеуі және бөлім қызметтері арасында абыройға ие болып отырғандығы қызметтегі мамандардың қажырлы еңбегінің арқасы деп білемін», - деді. «Сөзіне қарап ісін таны» демекші, білікті маманға телитін өжеттілік қасиеттің сыңары осы қайраттылық пен өз ісіне адалдық шығар. Қуаныш Нұрмұханбетұлының бойындағы бұл ерекшелігі оның ұзақ жылдар қару-жарақ қызметінде қызмет атқарғандығынан қалыптасуы мүмкін деп ой түйдік.

         Бұл бөлімшеде үлгілі қызметімен көпшіліктің құрметіне ие болғандардың қатарына қару-жарақ қоймасының бастығы 3 сыныпты сержант Е.Бектібаевты, «Қол сұғылмайтын запас қару-жарақтары мен оқ-дәрілер қоймасының бастығы» аға сержант М. Урозовты, қару-жарақты жөндеу шеберханасының бастығы сержант Н. Бекқадыровты және іс-жүргізуші сержант А. Қапшақпаеваны жатқызуға болады. Өздерінің ұжымы жайлы сержант Айгерім Қапшақпаева: «Мұндағы ұжымымыз өте ұйымшыл. Сіз, біз деп санаспай, ортақ міндетті екі қолдың он саусағындай жұптасып, жұмылып атқарғанды жөн көреміз. Жалпы қару-жарақ қызметінің маманына ең қажетті қасиет - ол ұқыптылық. Сондықтан біздің ісімізге енжарлық деген жат нәрсе. Қандай тапсырманы орындасақ та бастығымыз капитан Қуаныш Байзақовпен кеңесеміз. Ол өз кезегінде командир ретінде бізге өз білген-түйгендерін үйретіп келеді, үнемі қамқорлық танытады», - деді.

Қай құрылым, бөлініс, қызмет болсын, олар қашан да өз ұжымымен құрметті. Өз міндеттерін атқаруда уақыт пен сарп еткен қайрат-жігерімен санаспай қасқая еңбек еткен жандардың қай кезде де қызметтік көрсеткіштерін еселеудегі үлестері айрықша. Өйткені Отан алдындағы еңбегін ардың ісі деп білетін адамдар қашанда да ұжымның абыройы, бет-пердесі болып табылған. Көпшіл ісімен жанына жылу себе білген. Іскерлігі мен ынта-жігерін әскери бөлімнің мерейін биіктету жолына бағыттап жүрген бөлімнің қару-жарақ қызметінің мамандары, міне осындай.   Ал, өз мамандығының қадірін жете ұғынып, түйсінген жандар ғана еңбектегі елеулі биіктерді еңсере алса керек. Нар жолында жүк қалмас деген осы шығар...

 

Лейтенант Айдос Байшағыров

28237 әскери бөлімі

 

 


Көшірмеге қайта келу

Құрметті оқырмандар!

Электронды пошта арқылы Қазақстан және әлем әскерлерінде болып жатқан оқиғалар, жаңа қару-жарақтар мен әскери техникалар жөніндегі ақпараттарды, әскери қызметшілердің ар-намыс, әскери борыш жайындағы керемет әңгімелерін оқу үшін біздің жаңалықтар жіберіліміне тіркеліңіз. Онда «Сарбаз» газеті мен «Айбын» журналындағы материалдар жарияланады. Сіз әр аптаның басында бірінші болып, әскери жаңалықтарды біле аласыз!
Пікірлер

Жаңалықтар жүгіртпесі

 Жаңа КАМАЗ жүк көліктері ұсынылды

Жаңа КАМАЗ жүк көліктері ұсынылды

Семь граней Великой степи

Семь граней Великой степи