Әл-Фараби атындағы Қазақ ұлттық университетінің әскери кафедрасында ҚР Қарулы Күштері үшін запастағы офицерлерді даярлау бағдарламасы бойынша әскери кафедрада студенттерді дайындаудың шешуші кезеңі болған әскери оқу жиыны өтті.
Жиын барысында студенттер оқу тренажерларында іс жүзінде атыс қаруынан оқу атыстарының жаттығуларын орындады және жауынгерлік машиналарды жүргізу машықтарын пысықтады. Оқу жиынының соңында Әскери ант қабылдау рәсімі өтті. «Бүгін біз 2018 жылғы шығарылым курсанттарының әскери кафедрадағы барлық оқу кезеңі оқу жиынын қорытындылап жатырмыз. Айта кетерлік жайт, университет пен әскери кафедраның тарихында екінші рет запастағы офицерлерді даярлау бағдарламасын сәтті меңгерген студент қыздар ант қабылдады», - деді Әл-Фараби атындағы ҚазҰУ әскери кафедрасының бастығы полковник Олег Ажимов.
