«Шығыс» өңірлік қолбасшылығында 2016 оқу жылын қорытындылаған жиын өтті

Алғашқы күні 2016 оқу жылын қорытындылаған оқу әдістемелік жиынның жоспары түсіндірілді. Барлық топтарда лездеме ұйымдастырылды. Сержанттар кеңесін «Шығыс» өңірлік қолбасшылығының сержанты 1-ші сыныпты сержант Ғалымжан Таукебаев өткізді. «Дабыл бойынша әскери бөлімнің қимылы» тақырыбындағы нұсқаушылық-әдістемелік дәріс 28738 әскери бөлімінің базасында болды. Әскери бөлімді жауынгерлік әзірліктің жоғары деңгейіне келтірудегі қимыл, қарауыл бөлмесіндегі жеке құрамның әрекеті (қарауыл ауысымының тәртібі), казармадағы жеке құрамның амалы, басқарманың стационарлық пунктіндегі лауазымды тұлғалардың жұмысы, қоймадағы, жауынгерлік машиналар паркіндегі, роталық (батареялық) колонналардың жасақталу ауданындағы, әскери бөлімді блоктау кезіндегі жеке құрамның әрекеті іс жүзінде көрсетілді. Сондай-ақ, «Атысты жүргізуді ұйымдастыру», «Таңертеңгілік дене шынықтыру жасаудың әдістемесі», «Әскери шаруашылықты жүргізудің бақылауын ұйымдастыру» тақырыбында да әдістемелік сабақтар өтті. Үш күнге созылған жиында «Шығыс» өңірлік әскерлері қолбасшысының орынбасарлары оқу жылын қорытындылап, баяндама жасады. «Шығыс» өңірлік қолбасшылығы әскерлерінің қолбасшысы генерал-майор Нұрлан Мұсаханұлы Қашағанов 2017 оқу жылының қыс мерзіміндегі міндеттерді пысықтады. Бұдан соң 2016 оқу жылындағы «Шығыс» өңірлік қолбасшылығы әскерлері мен басқарма органдары дайындығының қорытындысы туралы бұйрық оқылып, жауынгерлік жарыстың жеңімпаздары марапатталды. Мотоатқыштар батальондары, танк батальондары, артиллериялық дивизиондар, зымыранды дивизиондар, зенитті дивизиондар, жедел қамтамасыз ету батальондары, штабтық батальондар, материалды-техникалық қамтамасыз ету батальондары арасында топты жарғандар мадаққа ие болды. Үздік рота, үздік взвод, үздік бөлімше де анықталды. Елеулі еңбегі үшін бір топ әскери қызметшіге мақтау грамотасы, тағы бірқатарына бағалы сыйлықтар ұсынылды.

2016 жылғы оқу кезеңіндегі жауынгерлік жарыстың қорытындысы

   Алда тұрған міндеттер жетерлік. Әскери мамандықтарға қатысты «АрМИ-2017», «Танк биатлоны», «Суворов шабуылы», «Артиллериялық атыс шеберлері», «Әскери барлаудың үздіктері» және тағы басқа байқауларға қатысу үшін де дайындыққа барынша күш салу керек. Құрлық әскерлеріне жүктеліп отырған міндет – қазіргі соғыс пен қарулы қақтығыстардың түр-сипатына сәйкес, әскери бөлімдер мен құрамалардың жауынгерлік және мобилизациялық әзірлігін одан әрі көтеру, әскери тәртіп пен құқық тәртібін нығайту, жеке құраммен жұмыс сапасын арттыру. «Қарулы Күштерінің 25 жылдығына – жоғары жауынгерлік дайындық» ұранымен басталатын 2017 оқу жылында жауынгерлік әзірліктің жоғары деңгейіне келтіруде жеке құрамның қимылын одан әрі жетілдіруге, елді мекендер мен таулы жерде ұрысты жүргізу үшін құрылымдардың дайындығын арттыруға, басқарма жүйесі мен әскерилердің дене дайындығын күшейтуге ерекше көңіл бөлінбекші. Жаңа оқу жылында жауынгерлік әзірлікті ұйымдастыру барынша жақсартылып, әскерилердің кәсіби біліктілігі мен жоғары тәртібіне де ерекше мән беріледі.