Шығыс» өңірлік қолбасшылығының Семей гарнизонына бір топ сарбаз келді
Алматы және Ақтөбе облыстарынан шақырылған 100-ден астам жауынгер Семейдің теміржол вокзалынан қарсы алынды. Жас сарбаздар жиынының әкімшілік құрамы санитарлы-гигиеналық шаралардың қатаң сақталуына ерекше мән берді. Коронавирус инфекциясының таралуына жол бермеу үшін әскерге шақырылушылардың жиын пунктерінде медициналық бекеттер дәрігерлерінің жіті бақылауында болып, жөнелтілу алдында экспресс-әдіспен тест тапсырған еді. Әскери бөлімдерге келген соң екінші рет тексеруден өтіп, міндетті түрде ПТР әдісімен лабораториялық зерттеу жүргізілді. Ондағы басты мақсат – жұқпалы індеттің әскери ортада таралып кетуіне жол бермеу. Әскери борышын өтеуге келгендер жас жауынгерлердің бір айлық жиынына қатысып, ол аяқталған соң әскери ант қабылдайды.
