Ақмола облысына жұмыс сапары аясында әскери ведомство басшысы Нұрлан Ермекбаев Шоқан Уәлиханов атындағы ҚР Қорғаныс министрлігі Кадет корпусының оқу-материалдық базасымен танысты.
Оқу орнына баруы барысында Қорғаныс министріне оқу және ғылыми база, әскери техниканың үлгілері, спорт кешені, мұражай және кадеттердің тұрмыстық жағдайы көрсетілді. Қорғаныс министрлігінің басшылығы сержанттар құрамын дайындау мен дамытуға айрықша назар аударатынын айта кету қажет.
Бүгінде Кадет корпусы кәсіби сержанттарды дайындаудың негізгі орталығы болып табылады. Арнайы бағдарлама шеңберінде Қарулы Күштерде және өзге де әлеуетті құрылымдарда сержанттар лауазымында келісімшарт бойынша қызмет өткеріп жатқан кіші командалық құрамның кәсіби кадрларын дайындау жүргізілуде. Сондай-ақ Щучьеде болуы барысында ҚР Қорғаныс министрі Қорғаныс министрлігі Армия орталық спорт клубының «Ботагөз» спорт базасына барды.
