«Шығыс» өңірлік қолбасшылығы 10810 әскери бөлімінің психологтары мерзімді қызметтерін өткеріп жатқан жас жауынгерлерге психологиялық жаттығуларды тұрақты өткізіп келеді.
Бейімделу кезеңінде сарбаздарға психодиагностикалық, психологиялық ағарту жұмыстары және психологиялық коррекциялық жұмыстар жүргізіледі. Сондай-ақ, мерзімді әскери қызметшілерге өздеріне деген сенімділіктерін арттыру, ұжымды біріктіру, жалғыздықтан шығу жолдарын көрсету мақсатында психологиялық тренингтер де өткізіледі. Аз ғана уақыт болса да, жас сарбаздар әскери өмірдің қыр-сырына төселіп, мінез-құлықтарын шыңдап келеді. Алғаш келген күннен бастап бір ананың балаларындай өзара жақсы қарым-қатынаста. Мерзімді әрбір әскери қызметшіге жоғары қолбасшылықтың бұйрығы бойынша әйел әскери қызметшілер бекітілген. Олар сарбаздардың күнделікті хал-жағдайын, тұрмыс-тіршілігін, туындаған мәселелерін анықтап, бөлім командиріне баяндап отырады. Ата-аналарымен де ұялы телефон арқылы хабарласып, сарбаз жайлы қажетті мағлұматтар алады. Ондағы міндет – Отан алдындағы борышын өтеуге талпынған жас жігіттердің әскери ортаға бейімделуіне барынша көмектесіп, дұрыс бағыт-бағдар беру, әрі патриоттық рухта тәрбиелеу. Ал сарбаздардың сөзіне жүгінсек, Отан алдындағы борышты өтеу – әр азаматтың парызы. Шымыр да сымбатты болуға, төзімділікке тек қана әскер шынықтырады. Әскери тәртіп пен жауынгерлік дайындық та күннен-күнге шыңдай түседі.