Армияда моральдық тұрғыдағы маңызды рөл тәрбиеші офицерлерге жүктелген. Олардың міндеті – азаматтарды нағыз әскери қызметші етіп тәрбиелеу. Осы аптада Қазақстан Қарулы Күштері тәрбиешілерінің институты өзінің құрылу күнін атап өтті.
Дәлірек айтсақ, 19 қаңтарда, яғни осыдан 23 жыл бұрын Қазақстан Республикасының Президенті – Қарулы Күштеріміздің Жоғарғы Бас Қолбасшысы Нұрсұлтан Назарбаевтың Жарлығымен елімізде командирлердің тәрбие және әлеуметтік-құқықтық жұмыс жөніндегі орынбасарлары институты құрылған болатын.
Содан бері әскери тәрбиешілер әр жылдарда өз саласын жандандырып келеді. Олардың ұйытқы болуымен жыл сайын өткізіліп жатқан тәрбиелік мәні зор іс-шаралар әскердегі азаматтармыздың рухани дамуына септігін мол тигізуде.