Бүгін Ішкі істер министрінің орынбасары Ерлан Тұғынбаев алдағы уақытта Халыққа қызмет көрсету орталықтары арқылы сынақ тапсырып, жүргізуші куәлігін алуға болатынын мәлімдеді. Ол үшін арнайы курстан өтудің қажет еместігін жеткізді.
Оның айтуынша, жүргізушілерді өз бетімен дайындау жүйесі енгізілуде. Мотокөлік және жеңіл автомобиль жүргізу құқығына беретін куәлікті арнайы ХҚКО арқылы сынақ тапсырып, алуға болады.
«Жол ережесін үйде өз бетіңізбен үйреніп, егер тәжірибелік машықтарыңыз бұрыннан бар болса, теориялық емтихан тапсыра аласыз. Арнайы ХҚКО-ға барып, тәжірибелік сынақтан өтесіз. Онда осыған арналған көліктер бар. Егер сынақтарды мүлтіксіз тапсырсаңыз, арнайы курста оқымай-ақ куәлік аласыз. Бұл жүйе сәуір айында іске қосылады», - дейді ол.