Тәуелсіздік жылдарында Қарулы Күштеріміз, басқа да әскерлер мен әскери құралымдар дамып, көптеген өзгерістерді бастан кешірді. Бүгінде бұл құралымдар жоғары деңгейде жабдықталған, ықтимал қатерлерге төтеп бере алатын заманауи армия.
Бұл – Елбасымыз - ҚР Қарулы Күштері Жоғарғы Бас қолбасшысы Нұрсұлтан Назарбаевтың еңбегі, яғни, мемлекетіміздің қауіпсіздігін, аумақтық тұтастығын, ел тыныштығын қорғауға бағытталған сындарлы саясатының жемісі.
Өйткені Президент Қарулы Күштер және басқа да әскерлер мен әскери құралымдардың даму бағытын заман ағымына, ел өміріндегі негізгі кезеңдерге сай айқындап отырды, оларды жетілдіру жолында көптеген өміршең шешімдер қабылдады. Мұның бәрі тәуелсіздік алғаннан кейін іс жүзіне асқаны баршаға мәлім.
Әрине, бұл тұрғыдан алғанда өзіміздің Қарулы Күштеріміз бен басқа да әскерлер мен әскери құрылымдарды құруда, оны жаңа заман талабына сай қалыптастыруда Елбасының еңбегі өте зор. Жалпы Қарулы Күшіміздің құрылу жолдарында әскери-саяси басшылықты ұйымдастыру, экономикалық, техникалық, әлеуметтік және құқықтық мәселелерді армияның жұмыс жасауы үшін шұғыл түрде шешу, ант, жарғы, әскери доктринаны, идеологиялық қамтамасыз ету жүйесін, елдің алғашқы әскери басшылығын құру, әскери кадрларды даярлау базасын нығайту, командалық құрамды тағайындау сияқты мәселелерді ел Президенті өз Жарлығымен заң жүзінде шешіп отырды. Өйткені Тәуелсіз Қазақстан армиясын құруда қорғаныс мәселесі бойынша құқықтық негіз Президент, Үкімет, Қорғаныс министрлігінде болды. Белсенді әрі мақсатты түрде жүргізілген жұмыстардың барысында алғашқы заңдар да дер уақытында, тиісті деңгейде жария болды.
Қазір заманауи және кәсіби әскері бар бейбіт елміз. Тәуелсіздіктің 25 жылында Қазақстан өзінің әскери әзірлігі және техникалық жарақтануы жағынан әлемнің алдыңғы қатарлы армияларымен иық теңестіре алатын дәрежеге жетті. Кәсіби тұрғыда шыңдалған Қарулы Күштеріміз халықаралық бірлескен стратегиялық кешенді оқу-жаттығуларына белсене қатысып, мерейлерінің үстем болып жүргені де бар. Еліміздің Қарулы Күштері жауынгерлік даярлықтың жоғары қарқынды деңгейімен, сапалы жұмылдыру резервімен, ұлттық әскери оқу орындары жүйесімен және қажетті материалдық-техникалық қамтамасыз етілуімен ТМД-ның кейбір елдерінің арасында оқ бойы озық тұруы да – біз үшін мақтаныш. Мұның бәрі әскери қызметшілердің жоғары кәсіби даярлығымен, үйлесімділік пен жауынгерлік дағды үлгісін көрсетумен және аға буынның батырлық, жауынгерлік дәстүр сабақтастығының жалғасуымен жетіп отырған жетістіктеріміз екенін баса айта кетейік.
Капитан Әсет Биғарашев
Жаңаарқа аудандық қорғаныс істері жөніндегі бөлім бастығы