ҚР Қорғаныс министрлігінің делегациясы Қырғыз Республикасының Бішкек қаласында өткен «Жауынгерлік бауырластық-2018» жедел-стратегиялық оқу-жаттығуы шеңберінде өткізілетін «Өзара іс-қимыл-2018» ҰҚШҰ Ұжымдық жедел ден қою күштерінің әскери контингенттерімен командалық-штабтық оқу-жаттығуға дайындалу және оны өткізу мәселелері бойынша екінші штабтық келіссөздерге қатысты.
Штабтық келіссөздер барасында қатысушылар «Өзара іс-қимыл-2018» командалық-штабтық оқу-жаттығуды өткізу ниетін, оқу-жаттығу басшылығы мен делдалдық аппараттың құрамын, қарулы жанжалды оқшаулау бойынша бірлескен операцияға дайындалу және өткізудің бүге-шігесін, тартылатын ұлттық контингенттердің жауынгерлік және сандық құрамын, сондай-ақ жан-жақты қамтамасыз ету мәселелерін талқылады. Ағымдағы жылы «Өзара іс-қимыл-2018» командалық-штабтық оқу-жаттығуы қазанда Қырғыз Республикасының аумағында өтеді. «Өзара іс-қимыл-2018» оқу-жаттығуының басты мақсаты ҰҚШҰ Ұжымдық жеден ден қою күштері құрамында Ұйымның мүше мемлекетерінің ұлттық контингенттерін бірлесіп жоспарлау және қолдану үлгілерін жетілдіру болып табылады.
