Жастар жылы аясында қорғаныс істері жөніндегі департаменті елордалық әкімдікпен бірлесе «Астана» концерт залында мерзімді әскери қызметке шақырылған бозбалаларды салтанатты шығарып салу рәсімін ұйымдастырды.
Іс-шараға Ұлы Отан соығысы мен Қарулы Күштердің ардагерлері, жергілікті билік органдарының, Қарулы Күштердің, басқа да әскерлер мен әскери құралымдардың өкілдері, шақырылушылардың ата-аналары мен туысқандары, сондай-ақ шақырылған қонақтар қатысты. Шара қатысушыларына ұйымдастырушылар жастардың әскерде қызмет етулеріне насихаттауға бағытталған әскери-патриоттық көрме өткізді. Көрмеде атыс қаруының, әскери киім-кешектің үлгілері ұсынылды. Шақырылушылардың алдында Ұлы Отан соғысының ардагері Бекмәди Ахат сөз сөйлеп, жас Отан қорғаушыларға ұрпақ сабақтастығы, әскери дәстүр мен Отанымызды қорғау кезіндегі әкелеріміз, аталарымыз мен бабаларымыздың батыл ерліктерін еске салды. Іс-шара соңында концерттік зал сахнасында Қазақстан Қарулы Күштерінің өкілдері қоян-қолтық ұрыстың айла-тәілдері мен қызмет өткерудің өзге де элементтерін паш етіп, мерекелік музыкалық нөмірлерді ұсынды.
