28738 әскери бөлімінің 3-ші реактивті-артиллериялық дивизионы «Шығыс» жалпыәскери полигонында теориялық білімдерін тәжірибе жүзінде бекітті.
Әскери бөлімнің 3-ші реактивті-артиллериялық дивизионы 220 мм 9П-140 «Ураган» әскери техникасынан 30-35 шақырымға дейінгі қашықтықта орналасқан нысанаға оқ атты. Алдымен жекелеген атыс жүргізіліп, кейін бірнеше дүркін оқ жаудырылды. Он алты реактивті снарядтың ұшырылуы машина командирі, нысанашы, механик-жүргізуші және қызмет көрсететін адамдардан құралған есептоптың ауызбіршілігінің нәтижесінде жүзеге асты.
Артиллерист-жауынгерлер бірде-бір оқты мүлт жібермей, белгіленген нысанаға дәл тигізу үшін кәсіби білімдері мен біліктіліктерін көрсетті. Мәселен, 9-шы батарея командирі аға лейтенант Ертай Абдиров, нысанашы ефрейтор Самат Елеуов, есептоп бастығы сержант Болат Балғабаев берілген тапсырманы жауапкершілікпен орындады. Жеке құрам далалық жағдайда жауынгерлік әзірлігін жан-жақты жетілдірді.
