Қорғаныс министрлігі басшылығынан құралған кешенді комиссия ҚР Қарулы Күштері Бас штабы бастығының орынбасары генерал-майор Мұхамеджан Таласовтың жетекшілік етуімен Десанттық-шабуылдау әскерлерінің құрамалары мен әскери бөлімдері басқару органдарының жауынгерлік әзірлігі мен жауынгерлік қабілеттілігін кенеттен тексерді.
Тексеру аясында негізгі оқыту пәндері бойынша әскери қызметшілердің жеке дара дайындықтары, оқу-жауынгерлік тапсырманы орындау, яғни, дабыл бойынша көтеру, берілген ауданға автомобильді марш жасау және екі күндік командалық-штабтық оқу-жаттығуды өткізу барысында бөлімшелердің үйлесімділігіне баға берілді. Тексерілген пәндер қатарында оқ ату, дене, саптық және арнайы даярлықтар, әскери топография, сондай-ақ жауынгерлік және жұмылдыру әзірлігі. Оқыту пәндері бойынша сабақтар ұдайы орналасу пунктінде және оқу-жаттығу орталықтары мен полигондарда өткенін айта кетейік.