Барша қазақстандықтар жуанның жіңішкеріп, жіңішкенің үзілетін, жаңару, күн мен түннің теңелетін шағы, әз-Наурыз мейрамын сән-салтанатпен қарсы алды. Қазақстан Республикасы Қарулы Күштерінің әскери қызметшілері де бұл мейрамды кең ауқымда атап өтті.
Биылғы Наурыз мейрамына орай Қарулы Күштерімізге қарасты Әуе қорғанысы күштерінің әскери қызметшілері қазақстандықтарға мерекелік тарту жасады. Атап айтар болсақ, Су-27 жойғыш ұшақтарында авиабазадан ұшып шығып, көк аспанда отбасы – ошақ қасының, ұрпақ жалғастығының, жанұялық жылулық пен ырыс-берекенің символына айналған шаңырақтың кескінін бейнеледі. Қазақ халқында осы элементпен көптеген ізгі тілектер байланысты. Мәселен, «Шаңырағың биік болсын», «Шаңырағың шайқалмасын» деген сынды ақ тілекке толы баталы сөздер жиі кездеседі.
