«Шығыс» өңірлік қолбасшылығы 2015 оқу жылын сәтті аяқтап, ҚР ҚК Құрлық әскерлерінің арасында үздік атанды.
Басты назар әскери бөлімдердің жауынгерлік ауызбіршілігі мен барлық деңгейдегі әскери қызметшілердің жеке дайындығына бөлінді. Мәселен, 25 наурыз бен 28 мамыр аралығында 40398, 10181 әскери бөлімдерінің қатысуымен «Жауынгерлікке бағытталған ауданға марш», «Дағдарысты ауданда арнайы әскери қимылдарды дайындау мен жүргізу» және «Құрамдастырылған тәсілмен жауынгерлікке бағытталған ауданға бригаданың жылжуы», «Арнайы операция барысында артиллерияның жауынгерлік қимылын дайындау мен жүргізу» тақырыбында екі бригадалық тактикалық жаттығу өтті. Өңірлік қолбасшылықтың көлемінде топты жарған рота мен батареяның 11 үздік командирі 2-7 сәуір аралығында ҚР ҚК Құрлық әскерінің сайысында жалпыкомандалық бірінші орынды иеленді.
ҚР ҚК Құрлық әскерінің үздік танк экипажын анықтап, Ресей Федерациясында танк биатлонынан болатын әлем чемпионатына қатысушыларды іріктеу мақсатында 25-28 мамыр күндері «Майлино» оқу полигонында өткен «Танк биатлоны – 2015» жарысында алғашқы жүлделі орындарды лейтенант Асылбек Мұсұрманқұлов пен лейтенант Еламан Әбішев басқарған танк экипаждары ұтып алды. Бұл екеуі де «Шығыс» өңірлік қолбасшылығының 10810 әскери бөлімінен. Үздік танк экипаждары «Алабино» полигонындағы халықаралық деңгейдегі жарыста да жоғары нәтиже көрсетті. Ал, 10-18 қыркүйек аралығында «Айбалта-2015» жедел-тактикалық жаттығуының аясында 27943 әскери бөлімінің қатысуымен 1 бригадалық-тактикалық жаттығу болды. Осы жаттығулар ұйымдастырылған аудандарға өңірлік қолбасшылықтың әскерлері темір жол көлігі және толық әскери жабдықпен жүріп өтуі қиын жер арқылы келді.
Сондай-ақ, 14-18 қыркүйекте «Шығыс» жалпыәскери полигонында стратегиялық командалы-штабтық «Орталық – 2015» жаттығуының жауынгерлік ату кезеңі бригадалық тактикалық топтардың қимылымен жүзеге асты. Жауынгерлік ату кезеңі Ми-17 әскери авиация тікұшағының жылжып келе жатқан қарсыластың техникасына соққы беруінен басталды. Қорғаныс ауданына батальондық тактикалық топ орналасты. Оның құрамындағы мотоатқыштар батальоны жаяу әскердің БМП-2 машинасы, бронды тесіп өту әлеуеті 375 мм шамасындағы танкіге қарсы РПГ-7 қол гранатасы, пулеметтер және өзге ату қарулары арқылы қарсыласқа оқ жаудырды. Артиллериялық дивизион да калибрі 122 мм Д-30 гаубицадан оқ атып, қарсыластың мото, жаяу әскер құрылымдары, ату құралдары, командалық пунктері талқандалды.
«Шығыс» өңірлік әскерлері қолбасшылығының басқармасы мен 10810, 30217, 44793 әскери бөлімдері құрамаларының тәжірибелік қимылы бірыңғай жедел жағдайда өтті. Өткен жылы 44736 әскери бөлімі арнайы мақсаттағы (аэромобильді) барлау ротасының жеке құрамы да алғашқы әуе-десант дайындығына қатысып, МИ-8 тікұшағынан және АН-2 ұшағынан парашютпен секіруден жаттықты. Қолбасшылыққа қарасты 10810 және 28738 әскери бөлімдерінде жауынгерлік әзірліктің сапасын жақсартуға бағытталған жаңа модульді жүйе одан әрі жалғасты. Осындай түрлі деңгейдегі жаттығуларға қатысу арқылы әскери қызметшілер кәсіби білімі мен біліктілігін одан әрі шыңдай түсті.
Қуандық Кенжеғұлов, аға лейтенант, (10810 әскери бөлімі):
«Мен Ресей Федерациясында танк биатлонынан ұйымдастырылатын халықаралық жарысқа бірнеше мәрте қатысып келемін. Танкіні тізгіндеп, түрлі әдіспен оқ ату, мүлт кетпей нысанаға дәл тигізу, соңғы нәтижесінде жүлделі орынды иелену нағыз кәсіби шеберлікті қажет етеді. Ал, «Орталық-2015» жаттығуында рота басқардым. Ротаны ұрысқа алып келіп, атысты ұйымдастырдым. Сөз жоқ, маңызды жарыстардан мол тәжірибе жинақтап жүрмін. Тілегім - кең көлемді осындай жаттығулар жиі қолға алынса екен».Сағат Хасенов, механик-жүргізуші (30217 әскери бөлімі):
«Роталық, батальондық, дивизиондық тактикалық жаттығулар өткізіліп тұрады. Ал, бригадалы тактикалық жаттығуды ұйымдастыру – өте күрделі тақырып қой. Былтырғы РФ ҚК әскерилерімен бірлескен жаттығуда бірқатар құрылымдардың өзара қимылы жұмылдырылды. Авиацияның нақты соққысы мен артиллерияның атыс кестесі мінсіз орындалды. Стратегиялық командалы-штабтық «Орталық-2015» жаттығуында өз басым тактикалық жағынан көп сабақ алдым. Қай жағынан шабуыл жасап, тактикалық қимыл-әрекетті қалай қолдану керектігін үйрендім. Механик-жүргізушілер де, көздеуші операторлар да, танк командирлері де өз міндетін өте жақсы орындады».
2015 жыл ішінде қарқынды жауынгерлік әзірлік барысында бөлімшелердің (есеп топтардың) 377 жауынгерлік атысы, оның ішінде 124-і түнде (32,8%), взводтардың 102 жауынгерлік атысы, оның ішінде 34-і түнде (33,3%), барлау құрылымдарымен 26 взводты-тактикалық арнайы жаттығулар, оның ішінде 17-сі түнде (56,6%), роталық тактикалық 75 жаттығу, оның ішінде 19-ы түнде (24,2%), батареяның тактикалық 98 жаттығуы, оның ішінде 32-сі түнде (40,5%), батальондық тактикалық 4 жаттығу, дивизионның 7 тактикалық жаттығуы және 158 далалық шығу жүзеге асты. Өткен жылда 5008 тәжірибелік ату қолға алынып, 1442-сі түнгі уақытта болды. Бұл 2014 жылмен салыстырғанда бөлімдер мен құрылымдардағы тәжірибелік ату санының 18 %-ға өскенін білдіреді. Бұған қоса, әскери техниканы жүргізудің саны да 10 %-ға артты. Былтыр техника жүргізудің 1924 шарасы (оның 694 түнгі мерзімде) өтті.
Сөз соңында. 2015 оқу жылында еліміздің Қарулы Күштерінде 3 600-ден астам жаттығулар, 21 000-нан астам түрлі қару-жарақтан тәжірибелік атыс, 680-нен астам далалық жағдайдағы жиын өтті. Жыл өткен сайын жауынгерлік әзірліктің деңгейі жетіліп, тиімділігі де анағұрлым артып келеді. Әрі жаттығуларды және сабақтарды дайындау мен өткізудің санына емес, сапасына күш салынады. Мұның барлығы не үшін қажет? Қарулы Күштеріміздің мына заманның талабына сай ұдайы жетілдіру үшін керек. Қазір әлем тыныш емес. Мемлекеттің қорғанысы – ең жоғарғы халықаралық стандарттарға сәйкес қазіргі кәсіби армияны дамыту деген сөз.
2015 жылғы оқу кезеңіндегі жауынгерлік жарыстың қорытындысы
атауы |
орындар |
әскери бөлімдер |
Жалпы әскери бригадалар арасында |
1 орын 2 орын 3 орын |
10810 әскери бөлімі 27943 әскери бөлімі 40398 әскери бөлімі |
Артиллериялық бригадалар арасында |
1 орын 2 орын 3 орын |
28738 әскери бөлімі 36803 әскери бөлімі 10181 әскери бөлімі |
Резервтегі бригадалар арасында |
1 орын 2 орын 3 орын |
30217 әскери бөлімі 35411әскери бөлімі 36376 әскери бөлімі |
Жауынгерлік қамтамасыз ету құрамалары мен бөлімдері арасында |
1 орын 2 орын 3 орын |
44736 әскери бөлімі 44793 әскери бөлімі 54770 әскери бөлімі |
Тыл техникаларын жөндеу мен әскерді толық қамтамасыз ету құрылымдар арасында |
1 орын 2 орын |
32388 әскери бөлімі 16443 әскери бөлімі
|
Сақтау базалары (қоймалары) арасында |
1 орын 2 орын 3 орын |
15701 әскери бөлімі 41446 әскери бөлімі 47007 әскери бөлімі |
Жеке әскери бөлімдердің арасында |
1 орын 2 орын 3 орын |
32355-К әскери бөлімі 21098 әскери бөлімі 12794 әскери бөлімі |
Әскери медициналық мекемелер арасында |
1 орын
2 орын
3 орын |
Семей қаласының әскери госпиталі Аякөз қаласының әскери госпиталі Үшарал қаласының әскери лазареті |